14.11.2025 12:18
Тавося Ускарса «Коми войтыр» öтмунöмнымлöн 34-öд чукöртчылöм мунiс Колваын, кодлы тырис 200 во артмöмсяньыс. Та йылысь ми гижлiм «Усинскса выль юöраным» колян номеръясын. Чукöртчылöм дырйи вося уджлы кывкöртöдъяс вöчис Ускарса комияслöн öтмунöмöн веськöдлысь Анастасия Гильманова. Сетам дженьдöдöмöн сылысь висьтасьöмсö.
Ми, «Коми войтырлöн» Ускарса юкöнын зiльысьяс, абу унаöнöсь, но вöчам ставсö, медым видзны да сöвмöдны коми кыв да оласног. Быдöнлöн удж, семья, но пыр жö корсям кад да вын, медым вöчны тыдавтöм, но колана удж. Та кузя пырöдчам унапöлöс мероприятиеö. Шуам, кутам топыд йитöд асвеськöдланiнлöн велöдан управленикöд и быд во пырöдчам «Знатоки родного края» турнир да школаясын велöдчысьяслöн комиöн кывбуръяс лыддян республикаса конкурсö. Миян öтмунöмын уджалысьяс пырöны жюриö да сетöны ассяньныс öти юалöмöн. Таво бара жö пырöдчим, дасьтiм да сетiм Семöндрей да Колваысь вермысьяслы козинъяс.
Урасьöм (февраль) тöлысьын карса медводдза номера школаын аддзысьлiм велöдан управлениеса специалист да школаса велöдысьяскöд, сёрнитiм коми кыв велöдöм йылысь, медводза классъясö пырысьяслы коми кыв велöдны коланлун йылысь. Та бöрын котырын зiльысьяс ветлiсны медводдза классъясö пырысьяслöн бать-мам чукöртчылöмъяс вылö. Сэнi ми висьталiм, мый первоклассникъяслöн эм позянлун бöрйыны велöдны коми кыв. Нимкодь, мый мöд номера школаын сюрис ичöт челядь, кодъяс тавосянь велöдöны урокъяс бöрын коми кыв каналан пыдди. Сiдзкö аддзысьлöмъясыс эз кольны весьшöрö. Сiдзжö тавосянь карын воссясны комиöн сёрнитны да гижны кöсйысьяслы велöдан курсъяс.
Быд во пырöдчам коми кыв кузя диктант гижан регионъяскостса акцияö, кодöс нуöдöны мирын чужан кывъяс нимöдан лунö урасьöм тöлысьö. Гижысьыс пыр содö. Таво сiйöс, шуам, миян муниципалитетын гижис 167 морт, колян во – 102, а 2023-öд воын – сöмын 71. Котырын зiльысьяс отсалöны СВО-ын служитысьяслы: чукöртöны сьöм, колана кöлуй, кыöны кепысь, латшъяс, маскировочнöй сеткаяс да с. в. Та кузя торъя аттьö Анна Семёновна да Валентина Витальевна Каневаяслы.
Котырын зiльысьяс мöд во нин пырöдчöны «Йöлöга» быд вося муниципальнöй фестивальö, кодi мунö Нöвикбöжын. Сэтчöс артистъяслы дасьтам «Коми войтырсянь» торъя приз да козинъяс. Колян вося кöч (сентябр) тöлысьö Ускар чужан лунö лöсьöдiм челядьлы ворсан площадкаяс, нуöдiм накöд ворсöмъяс.
Тшеллябöжысь Светлана Ивановна Напалкова коми кыв да литература велöдысь лоöма таво «Коми велöдысь» республикаса конкурсын вермысьяс пиысь öтиöн. Ми век кутам сыкöд йитöд да чолöмалам вермöмöн. «Коми войтыр» топыда уджалö «Движение первых» том войтыр котыркöд. Шöр нырвизыс сылöн – чужан му история туялöм. Таво ми öтлаöн пырöдчим «Движение первыхлöн» ставроссияса конкурсö да шедöдiм коймöд места, босьтiм 200 сюрс шайта премиа. Сьöмсö видзам чужан му история водзö туялöлöмö. «Коми войтыр» 2025-öд воын пырöдчö республикаса геройяс йылысь медиапроектö, ми тшöтш гижалiм видеороликъяс асланым сикт-грездъясын олысь геройяс йылысь да йöзöдiм «Коми войтырлöн» Интернет сайт вылас.
Косму (апрель) тöлысьö ми аддзысьлiм муниципалитет веськöдлысьяскöд, сёрнитiм коми кыв да оласног видзöм-сöвмöдöм йылысь, лöсьöдiм водзö удж кузя öтувъя планъяс. Тулысын миян дорö шыöдчис Нöвикбöж культура керкаöн веськöдлысь Татьяна Аксентьевна Викторова Ыджыд Айму вывса кöра батальонъяс йылысь небöг отсавны лэдзны. Ми чукöртiм колана сьöм, код вылö вöлi лэдзöма «Дорога к Победе» 54 небöг.
Моз (август) тöлысьын сиктса велöданiн лункöд йитöдын вöлi котыртöма медбур сиктса школа вылö республикаса конкурс. «Коми кыв медбур видзысь» номинацияын вермалöма Нöвикбöжса начальнöй школа-сад, кодöн веськöдлö «Коми войтырын» зiльысь Людмила Сергеевна Палехова. Аттьöалам сiйöс вермöмöн. Дерт, медыджыд шедöдöмторйöн миян уджын позьö лыддьыны «Ми танi олам» медводдза фестиваль, кытчö ми тшöтш зiля пырöдчим. А Елена Витальевна Истомина да Людмила Николаевна Мартынова весиг пöжалiсны да гöститöдiсны быд кöсйысьöс чöскыд шаньга да чериняньöн.
Уджнымöс водзö кутам нуöдны. Шыöдча карса асвекськöдланiн юралысьяс дорö. Локтан во Сыктывкарын мунас «Пера-багатыр» коми зонъяс костын республикаса конкурс. Корам отсавны аддзыны кöсйысьöс сэтчö пырöдчынысö. Аттьöала ставсö, кодi уджалö «Коми войтыркöд» öтув.
Присоединяйтесь к нашему Telegram-каналу.
Присоединяйтесь к нашей группе в ВК.
Материалы из рубрики "Жизнь городская" читайте здесь.
ДРУГИЕ НОВОСТИ ЧИТАЙТЕ ЗДЕСЬ
Комментарии
Комментариев пока нет
Создание сайтов