20.07.2023 09:00
Россияын сора (июль) тöлысся быд коймöд суббетаö нимöдöны вузасянiн, бытöвöя могмöданiнъясын, жилищно-коммунальнöй овмöсын уджалысьясöс. Талун висьталыштам Ускарысь Зинаида Замалиева коми ань йылысь, кодi уджалö сёян-юанöн неыджыд öти карса вузасянiнын.
Тöдмасьöмыс сыкöд лои виччысьтöм. Быд вежон ми магазинас, кöнi ань уджалö, новлам газетъяснымöс. Öтчыдысь пыри да кылi прилавок сайсянь: «Газетныдтö виччысьöны, юасьöны». Гежöда коми гор роч вузасянiнад кылан, да шуи тöдмасьны анькöд. Содтöд и помка лои аддзысьлынысö.
Нелямын воысь унджык сiйö уджалö вузасьысьöн. Волöма Ускарö том, кызь кык арöса нывкаöн на 1980-öд воын, а тавося вöльгым (ноябр) кöкъямысöд лунö тыртö 65 арöс нин. И век на прилавок сайын, сы вöсна мый радейтö уджсö, ёртъяссö, кодъяскöд öтлаöн уна во зiльö, ньöбасьысьяссö. Ачыс сибыд, кыпыд руа, и йöзыс аддзöны тайöс да сибалöны.
Сёрнитiм магазинас, кöнi ньöбасьысь век пырö-петö, унджыкыс тöдöны Зинаида Фёдоровнаöс (буракö, тшöкыда татчö волöны) да ошкöны. «Бур, ыджыд сьöлöма, некор оз скöрав, век петкöдлас, мый бурджык босьтнысö, миян пенсияясыд ичöтöсь да донтöмджык тöварсö, кодi донасьыс ёнасö оз торъяв, на индас», – шуис Татьяна ньöбасьысь.
Чужлöма Зинаида Замалиева Инта районса Епа нима вöвлöм грездын. Сiдз шулöмаöсь грездсö медводдза олысьыслöн, дас öкмысöд нэмын Изьватасысь волöм Ефим Петрович Артеев ним, вич да ов сертиыс. Епаыс сулалö Лемва ю бöкын, кодi усьö Усваö, ветымын километра Инта районса öнiя Абезь посёлоксянь. Ань кывъяс серти, важöн сэнi вöлöмаöсь колкоз, школа, челядь сад, клуб, больнича, мöс да вöв видзанiнъяс, нянь пöжаланiн. Олöмаöсь öти котырöн, öтув. Вочасöн туйяс абутöм да сьöкыд оланног помла том войтыр муналöмаöсь бурджыкаинъясö, а 2015-öд воын бöръя пöрысь йöзсö сэтысь вуджöдöмаöсь овны Интаö, благоустроитöм патераясö. Со тадзи и бырöма грездыс.
«Рöдинанымöс ог вунöдöй, быд во локтам Епаас, сэнi öд ичöтдырся керкаясным сулалöны, ставыс асланым, – висьталö Зинаида Фёдоровна. – Ме быд во жö öтпускöй дырйи ветла. Таво муна и. Гожöмъяснас Епаным ловзьö, бöр йöзöн тырö, кöть эськö ни электричество, ни телепона йитöд абу нин, но сьöлöмным кыскö чужанiнö. Медбур шойччöмным сэнi».
Аньлöн батьыс Фёдор Иванович Канев дас кöкъямыс арöсаöн мунлöма Ыджыд Айму вöсна тыш вылö, а локтöм бöрас сiйöс пуктöмаöсь веськöдлыны колкозöн. Ыджыд мывкыда да пыддипуктанаöн вöлöма, отсалöма йöзыслы быдторйын, тшöкыда гижасьлöма Инта районса «Искра» газетö. Мамыс Нина Павловна Микулина направление серти волöма роч муяс вылысь, велöдлöма школаын, сэсся челядь садйын воспитателялöма. Семьяын вöлöма квайт челядь (вит ныв да öти зон). Öнi ловъяöсь сöмын Зинаида да Елена ичöтджык чойыс, кодi олö Интаын.
Школа помалан воас батьыс аньлöн кувсьöма да сылы ковмöма кольччыны грездын, мамыслы отсасьны, видзлöмаöсь скöт да. «Турун пуктылi, пес дасьтi, чери мужичöйяскöд кыйи, – казьтылö Зинаида. – Кор вокöй локтiс армияысь ичöтджык чойöйкöд мунi Уква карö да велöдчи кассир-контролёр вылö. Тадзи и йитi вузасян уджкöд олöмöс». Направление серти текникумсянь аньöс ыстöмаöсь Ускарö. Öнöдз помнитö, кыдзи локтöма кыпöдчысь-паськалысь карö АН-2 самолётöн. Уджалöма вöвлöм ОРС-лöн 26-öд номера магазинын (сiйöс карсаяс тöдöны Строителей улич вывса «Стекляшкаöн»). Сэсся ОРС бырöдöм бöрын вуджöма «Усасельторгö», кöнi зiльöма пенсияöдзыс. Кык во шойччыштöма, но радейтана уджыс бöр кыскöма.
Ускарын ань котырасьöма. Таво нелымын во Наиль верöсыскöд öтлаасьöмсяньныс пасъяс. Быдтöмаöсь кык нылöс, быдмö вит арöса София нучка. Олöны Мира улич вывса асöн ньöблöм кык вежöса благоустроитöм патераын. Прöст кадас Зинаида радейтö олыштны öтнас, ягын вотчыштны либö тшакасьыштны и, дерт, сьöлöмнас да казьтыöлмъяснас век вöвлöм чужан Епаас, радейтанаинас.
Григорий Кожевин
Усинская новь
ДРУГИЕ НОВОСТИ ЧИТАЙТЕ ЗДЕСЬ
Комментарии
Комментариев пока нет
Создание сайтов