30.07.2023 08:00
Талун странаын пасйöны саридзвывса вöеннöй флотын служитысьяслысь лун. Уна коми зон армия дырйи ветлалöма саридз вывтi. На пöвстын Колваысь Анатолий Игнатов.
Öти во сöмын и вöлöма Анатолий флотас, но казьтылöмъясыс колясны нэм кежлас: удитöма ветлыны вит саридзтi, кык океантi, учениеяс вылын велöдчöма тшöтш америкаса, китайса, норвегияса морякъяскöд, лыйсьöма став сикас корабельнöй орудиеысь, ветлöма мирын тöдса «Адмирал Чебаненко» ваувса пыжъяс бырöдан фрегатöн и весиг служитлöма «Пётр Великий» Россияса медыджыдъяс пиысь öти атомнöй крейсер вылын. Некымын страна дортi прöйдитлöма.
Зон чужöма 1991-öд вося тöвшöр (январ) тöлысь öкмысöд лунö да быдмылöма Колваын. Сэнi начальнöй школа помалöма, сэсся öкмысöд классöдз велöдчылöма Парма орчча посёлокын, сиктас велöдöны сöмын нёль классöдз да. Бöрыннас пырöма Ускарса политехническöй текникумö да босьтöма мусир перйысь операторлысь специальносьт.
Армияысь 2011-öд воын локтöм бöрас овмöдчöма Валентина Ивановна Артеева бабыскöд пöль-пöчыс керкаын. Бабыслы кöкъямысдас сизим ар, нукыс отсалö сылы керка пытшкöс уджъяс вöчны, дзоньвидзалуныс бöрся видзöдö. Ачыс служитö профессиональнöя неминучаяс да аварияяс бырöдан отрядын Ускарын. Заводитлöма прöстöй боецсянь, а öнi веськöдлö сэтчöс взводöн, лоö содтöд инженерöн. Заочнöя пырöма велöдчыны Укваса индустрия гос-
университетлöн Ускарса филиалö, мöд во помалас нин.
– Керка гöгöр удж тшöтш вöча: йöрын малина да клубника кустъяс, пуяс быдмöны, – висьталö ас йывсьыс Анатолий Юрьевич. – Водзсö Валя бабöй кöзаяс, межъяс да ыжъяс видзлiс, а сэсся эновтчим: ачыс пöрысь нин, менам кадыс оз тырмы. Öнi Колваын унджыкöн гортса пемöсысь бырöдчöмаöсь нин. Кокниджык карын сьöм нажöвитны, а став колана сёян-юаныс вузасянiнъясын эм. Прöст кадъясас сиктса самодеятельносьтын сьыла, ветла пыжöн чери кыйны аслам «Ветерок» моторöн, тшаксьыштлывла, сэтöр öктыла.
Тадзи кадыс и мунö зонлöн. Медсясö удж вылас и кольö. Водзсö вöлöма аслас машина да вузалöма, öнi сöмын мотоцикл. Колö сiйö ва да пес вайны, мукöд быдлунъя сиктса удж вöчны. Чужанiнас зонлöн уна ёрт, гажтöмавны некор. Со и ВМФ пасъян лунö быд во чукöртчылöны, ветлöны ю дорö, би пестöны, шоныд кö, Колва юын либö сикт дор тыясын купайтчöны, казьтылöны служба йывсьыныс. Флотын сиктса служитысьыс морт дасысь унджык чукöртчас пö.
– Нимкодь да шуда, мый служитi флотын, – водзö висьталö Анатолий Игнатов. – Уна буртор сiйö сетiс. Медсясö кывтö кутны да видзны ёрталун. Татöг морфлотад он вермы. Сэнi колö пыддипуктыны орчча служитысьяссö, быд здукö отсöг вылö локны, ковмас кö. Тшöтш паметям коляс саридзьяс вывтi ветлалöмыс, мича да вына карабъясным, ставöн, кодкöд öтлаöн служитлi. Öнöдз мукöдыскöд кута йитöд, гижасям соцсетьяс пыр, аддзысьлам. «Адмирал Чебаненко» вылас нёльсё морта экипажын Комиысь служитлiс дзик öти зон Печора районса Кожва посёлокысь Николай Коробов. Сыкöд ёртася. Некор ог вунöд, кыдзи ми ветлiм норвегияса карö. Йöзыс сэнi шаньöсь, уличьясыс мичаöсь да сöстöмöсь. Тшöтш паметьын коли «Курск» атомнöй ваувса пыжын пöдöмаясöс казьтылöм, Баренцево саридзлöн местаас, кöнi лои неминучаыс, чöвтiм уна венок.
Водзö вылö Анатолий Юрьевич кöсйö помавны университет да босьтны инженерлысь диплом, гöтрасьны, челядь чужтыны, водзö отсавны бабыслы. Колва сиктыс сылы кажитчö, чайтö сэнi и водзö овны. А томъяслы, кодi мöдöдчö служитны, вöзйис не повны армияса сьöкыдлунъясысь. Мыйö колö велöдасны, отсаласны верстяммыны, выль тöдöмлунъяс босьтны, дорны карактер. Ёртъясыслы праздник водзын сиö дзоньвидзалун, кыпыд ру, лöнь олöм да вермöмъяс и, дерт, некор не вунöдны саридзвывса службаныссö.
Григорий Кожевин
Усинская новь
Подписаться на электронную интерактивную газету Усинск-Новости.
ДРУГИЕ НОВОСТИ ЧИТАЙТЕ ЗДЕСЬ
Комментарии
Комментариев пока нет
Создание сайтов