26.09.2023 15:00
«Коми войтыр» öтмунöмнымлöн Ускараса юкöнöн веськöдлысьöс бöръяс правление. Татшöм помшуöм лои вынсьöдöма колян воторникö усинскса «Коми войтырö» пырысьяслöн кывкöртöда-бöрйысяна чукöртчылöм вылын. Öнi котырнас юрнуöдö важ веськöдлысьыс – Анастасия Выучейская.
Конференция вылö локтöмаöсь вöлiны став сикт-грездысь да Ускарысь нелямын сайö бöрйöм йöз. Чукöртчöмаясöс удж заводитчытöдз чолöмалiсны Коми Республикалöн унасикас войтыр политика министерствоöн веськöдлысьöс вежысь Станислав Бушков, «Коми войтырöн» юрнуöдысьöс вежысь, Коми Республикаса Общественнöй палатаöн, да республикаса Ёртасян керкаöн веськöдлысь Григорий Хатанзейскöй, карса мэрöс медводдза вежысь Татьяна Анисимова. Сьылiсны-гажöдыштiсны «Войвывса дзоридзьяс» карса котырын зiльысьяс.
Анастасия Выучейская вöчис кывкöртöдъяс аслас нёль вося удж кузяыс: «Кöть эськö веськöдлöмöй виччысьтöг уси пöрöс висьöмкöд тышкасян кад вылö, но век жö зiлим отсавны бурмöдны коми йöзыслысь олöмсö, нуöдiм уна мероприятие карын, сикт-грездын коми кыв да оласног сöвмöдöм кузя: конкурс, кончерт, аддзысьлöмъяс, пырöдчим республикаса уджтасъясö, гижим коми диктант…».
Мый вöчöма нёль воöн карса асвеськöдланiн воддза коми чукöртчылöмъяслöн вöзйöм-тшöктöмъясным кузя висьтасис Ускар веськöдлысьöс вежысь Айгуль Актиева. Нöвикбöж школаöн юрнуöдысь Людмила Палехова юксис грездын неважöн восьтöм коми мультстудия уджöн, а Людмила Акимова Пармаысь роч кыв да литература велöдысь (уна во таöдз велöдiс Тшеллябöжын коми кыв да литература) висьталiс Коми велöдысь республикаса конкурсö аслас пырöдчöм йылысь да мыйöн конкурсыс сылы отсалiс.
Сэсся кыв сетiсны сиктъясысь воöм войтырлы. Унаöн аттьöалiсны карса асвеськöдланiн, «ЛУКОЙЛ-Коми» да мукöд предприятие уджалысьясöс сиктса олöм видзны-сöвмöдны, кокниöдны зiльöмысь. Дерт, пыртiсны вöзйöмъяс, юксисны сьöкыдлунъяснаныс. Паськыдджыка та йылысь лоö йöзöдöма «Усинскса выль юöр» локтан номеръясын.
Кост бöрын юалöмъяс вылö вочавидзисны Коми Республикаса министерство да ведомствоясын зiльысьяс, висьтасисны делегатъяс. Кыптылiс сёрни туйяс дзоньталöм, бурдöдысьяс тырмытöм, пыж-мотор регистрируйтöм, телепона да пошта йитöд мытшöдъяс да уна мукöдтор йылысь. Торйöн кыпöдлiм школаясын коми кыв да литература велöдан часъяс ыдждöдны коланлун йылысь. Талун коми сиктъясын кыв да серпасалан гижöдъяснымöс велöдöны öти часöн кык вежоннас, а карад дзик оз велöдны. Тшöтш колö эськö, медым вузъясö пырысьяслы, кодi бураа сёрнитö комиöн, пуктiсны содтöд баллъяс. Тайö ышöдас томъясöс тöдны да велöдны коми кыв.
Помланьыс лои бöрйöма «Коми войтыр» дiнмукостса öтмунöм XIII-öд чукöртчылöм вылö сизим мунысьöс (съездыс лоö локтан вося сора (июль) тöлысьын Сыктывкарын, Иван Куратов тшупöда лун чужöмсяньыс пасйигöн), ускарса юкöнöн веськöдлан котыр да вынсьöдöма чукöртчылöмыслöн дженьыд кывкöртöд (резолюция).
Григорий Кожевин
ДРУГИЕ НОВОСТИ ЧИТАЙТЕ ЗДЕСЬ
Комментарии
Комментариев пока нет
Создание сайтов