27.09.2023 14:00
Талун Россияын пасйöны кагульничаяслысь да челядь садъясын зiльысьяслысь удж. Миян муниципальнöй кытшын восьтöма 19 детсад либö школа-сад, кöкъямысыс – сиктъясын, а уджалöны сэнi сизимсё сайö морт: кага видзысь, музыка да физкультура велöдысь, логопед, идрасьысьяс да с. в. На пöвстын Светлана Витязева «Светлячок» 24 номера челядь садйын кага видзысь.
Чужлöма сiйö Изьва районса Варыш грездын, кодi пырö Сизяб сиктсöветö. Ань лоö Комиын тöдса бурдöдысь да лы веськöдысь Тандзе Марья рöдысь. Батьыс Рочев Юрий Тимофеевич уна во уджавлöма школаын музыка, физкультура, трудъяс велöдысьöн. Водзмöстчысь, сьылöма, йöктöма, ворсöма баян да аккордеонöн, сьыланкывъяс гижлöма, культура керкаын артиставлöма. Весиг сьыланкыв небöг сылöн петавлöма. Котралöмын кыкысь вöлöма РСФСР-са чемпионöн, гожся многоборьеын республикаса чемпионöн. Колян во кувсьöма сизимдас кöкъямыс арасаöн.
Мамыс Галина Петровна Рочева нэмсö уджавлöма бурдöдысьöн. Ачыс сiйö Печора карысь. Уджавлöма Мохча да Изьваса больничаясын. Чужтöмаöсь да быдтöмаöсь нёль челядь, Светлана на пöвстын вöлi мöд. Öнi медыджыд чойыс семьянас олö Изьва сиктын, ичöтджыкыс – Архангельск обласьтса Северодвинск карын, тшöтш воспитатель, а вокыс – Варышас, бать-мам керка видзысь, вахтаясöн уджалö мусир перъян компанияын.
Ичöтсяньыс Светалы кажитчöма ветлыны грездса садикас, зэв радейтöма ассьыс воспитательсö. А кор школаö мунöма, тшöкыда кага видзанiнас пыравлöма, ыджыдджык классъясас велöдчигöн радпырысь вежлöма öтпускалысь детсад уджалысьяссö.
– Сэки и чужис менам мöвп лоны воспитательöн, – казьтылö Светлана Юрьевна. – Кор помалi 1991-öд воын школа, дзик пыр мунi велöдчыны Сыктывкарса педучилищеö. Куим во мысти бöр локтi чужанiнам. Батьöй ликтiс уджавны Гамö, сiйö Варышсяньыс матынджык, оз ков вуджны Ижма юсö. Дас во зiли керкаын, кодöс кыпöдлöма Тандзе Марья прапрабабöй на. Бöрыннас нин тöдмалi, мый сылысь ыджыд, топыд выла-ула керкасö мырддьылöмаöсь да лöсьöдöмаöсь садик улö, кодi öнöдз сэнi меститчö.
Гамас ань петöма верöс сайö. Регыд чужöма Людмила ныв. Иван верöсыс уджалiс вахтаясöн Ускарын. Та вöсна 2003-öд воын гозъя шуисны вуджны овны татчö. Ньöбöмаöсь патера, вайöдiсны челядьсö. Светлана пырис уджавны «Светлячокö». Пыр жö и кажитчöма выльлаинын кага видзны. Уджалысьясыс бурöсь, томъяслы отсасьöны. Недыр мысти чужöма София нима мöд челядь. Öнi Людмила олö да уджалö Питерын, а София велöдчö Россия лунвылын, Краснодарса кооперация институтын, 3-öд курсса студентка.
Кага видзысь нуöдö унапöлöс мероприятие челядьыскöд, зiльö найöс велöдны коми кывйö, тöдмöдö чужан оласногöн, висьтавлö, кыдзи важöн комияс пасьтасьлöмаöсь, мый сёйлöмаöсь, кодлы эскылöмаöсь, кутшöм сьыланкывъяс сьылöмаöсь, мыйöн ворслöмаöсь да с. в.
– Миян садйын эм «Зарни куд» краеведческий музей, – висьталö Светлана Юрьевна. – Сэнi чукöртöма важ коми кöлуй, паськöм, аканьяс... Музеяс ме нуöда быдмысь войтыркöд кружокъяс. Челядьлы кажитчö ворсны танi, кывзыны коми мойдъяс, велöдны йöзкост шусьöг да нöдкывъяс. Ыджыд гажъяс дырйи кагаяскöд пуктам коми спектакъяс, важ ворсöмъяс нуöдам. А кутшöма кажитчö ичöтъяслы пасьтасьны важ коми ног! Тадзи, чайта, и артмö чужан му дорад муслуныд.
Прöст кадъясас ань радейтö ветлыны вöрö, ловнас сэнi шойччö, тшакасьö, вотысасьö. Уна во сьылö «Войвывса дзоридзьяс» карса ансамбльын. Ичöтчяньыс коми сьыланкывъяссö тöдö, чужан сиктас на самодеятельносьтö ветлывлöма да, уна сикт-грездын сьылöма-йöктылöма.
– Ме рад, олöмныс кö кагясыслöн, кодöс коркö видзлi, артмö, найö воöдчöны ыджыд да тöдчна йöзöдз, – шуис помланьыс Светлана Витязева. – Таын öд и менам кутшöмкö пай. Чолöмала уджалан ёртъясöс профессиональнöй гаж лунöн. Сиа дзоньвидзалун, выль вермöмъяс, радейтны ассьыныс уджныссö да мед налöн быдтасъясныс оз вунöдны, тшöкыдджыка аттьöалöны найöс. Кузь нэм да бур шуд!
Григорий Кожевин
Усинская новь
ДРУГИЕ НОВОСТИ ЧИТАЙТЕ ЗДЕСЬ
Комментарии
Вы-большая умница!Гордимся !
Создание сайтов