08.02.2024 12:00
Отсалiсны налы Сыктывкарысь Тима Вень нима культура колледжса нёльöд курсын сьывны велöдчысьяс Владлен Туркин велöдысьныс веськöдлöм улын. Мероприятиеыс мунiс Усинск районлы урасьöм 21-öд лунö нелямын öкмыс ар тырöмкöд йитöдын Ускарса культура дворечын.
Концерт водзын локтöмаяс видзöiсны да нимкодясисны «Войвыв серъяс» («Орнаменты Севера») уна рöма да биа выставкаöн, кодöс вöлi лöсьöдöма дворечлöн фойеын. Сэнi вöлi сувтöдöма чум сяма экспозиция, öшöдöма кöръяса фотоколлаж, пуктöма вöрса пемöс да лэбач, мырпом макетъяс да с. в. «Вöртас» муниципальнöй шöринысь ас киöн вöчасьысьяс петкöдлiсны уджъясныссö, позис сьöлöм вылö воöмасö ньöбны аслыд козин пыдди.
Артистьяслöн петкöдчöмыс заводитчис попуррисянь, кодi шымыртöма ансамбльлöн репертуарысь важ да öнiя сьыланъяс. Медсясö найö ыдждöдiсны кöр видзысьяслысь удж да олöм. Искусствояс школаса велöдчысьяс петкöдлiсны ичöт кöръяслысь йöктöм, кöр батальонöн миян сикт-грездысь кöръясöн мунöмаяс йылысь лыддис баллада Илья Юркин артист, сцена вывса экранын петкöдлiсны кöр видзысь-фронтовикъяслысь фотографияяс да с. в. Синмö шыбитчисны мича, югыд костюмъясыс артистъяснымлöн. Торъя номерöн найö петкöдлiсны коми кöр висдзысьяс да вöралысьяслысь аслыпöлöс мича костюмъяс. Найöс думыштöмаöсь да вурöмаöсь «Войвывса дзоридзьясын» сьылысь аньяс асьныс. Юркарысь воöмаяс (на пöвстын велöдчöны и Усинскысь кык ань) козьналiсны важ коми да роч сьыланъяс. Ставыс вöлi дасьтöма сьöлöмпырысь, коми кыв да оласногным дорö радейтöмöн. Сцена вылын вöлiны и арлыда, и муртса кок йылö сувтöм кагаяс.
– Ыджыд аттьö сьылан-йöктан ёртъясöйлы, Сыктывкарысь локтöмаяслы, ставыслы, кодi отсалiс дасьтыны да петкöдчыны сцена вывсянь, – висьталiс концерт бöрын «Войвывса дзоридзьясöн» веськöдлысь, муниципальнöй кытш сöветса депутат Екатерина Терентьева. – Ансамбльлы таво тырö комын кык во. Ыджыд туй вуджим, уна вермöм шедöдiм, торъя нин йöзкостса котыр ним. «Войвыв туй» концертным – миян вося уджнымлöн кывкöртöд. Ми петкöдлiм ставсö, мый кужам, мыйö велöдчим кузь да мудзтан репетицияяс дырйи. Чайта, мый артмис. Асьныд аддзылiнныд, кыдзи видзöдысьяс клопайтiсны, аттьöалiсны, чветъяс козьналiсны. Налы ми и уджалам, кöсъям, медым сьöлöмныс век пым вöлi коми кыв, коми йöз, оласногным дорö. Сэки и аскиалунным вылö видзöдласным лоö югыдöн, лача кутанаöн.
Концерт бöрын артистъяс петалiсны фойеö, варовитiсны зрительяскöд, öтлаöн фотографируйтчисны. Вичмис сёрнитыштны и öткымын видзöдыськöд, кори найöс донъялыштны петкöдчöмсö.
Алёна Бережко:
– Сё пасибö коми артистъяслы. Ставыс зэв кажитчис: костюмъяс, сьыланногныс, йöктöмыс, выставкаыс. Ме ачым Украинаысь, сьыла «Червона калына» котырын, но радейта да пыдди пукта коми оласног. Мед эськö и водзö олас-вылас ансамбльныд, йöзсö гажöдас выль уджъясöн.
Адик Рочев:
– Быд во зiля видзöдны «Войвывса дзоридзьяснымлысь» петкöдчöмъяссö. Век шемöс босьтö налöн сьыланногныс, ыджыд кужанлунъясныс. Быттьö аслад чужанiнö волан – войвыв вöрö либö ю дорö, тундраö. Ансамбляс ветлöны Катя нылöй да Дима нукöй. Ми котырын ставным пыддипуктам да зiлям сöвмöдны чужан кыв да оласног. Ачым чужлi да быдмылi Денисовкаын, нелямын вит во нин ола Ускарын, связьын уджалi, öнi пенсия вылын.
Юрий Тураев:
– Татчö овны вои куим во сайын Волгоградысь и дзик ог жалит, кöть уна во нин пенсия вылын. Меным кажитчö Ускар му, татчöс ыджыд сьöлöма да авъя йöзыс. Аттьö концертысь, ыджыд уджысь, кодöс тi вöчанныд оласногныдтö видзöм помла.
Григорий Кожевин
Источник: Усинская новь
Фото втора и Евгения Волдаева
ДРУГИЕ НОВОСТИ ЧИТАЙТЕ ЗДЕСЬ
Комментарии
Комментариев пока нет
Создание сайтов